გაეროს ავიაციის სააგენტომ ლითიუმ-იონის ბატარეების სამგზავრო თვითმფრინავებით გადატანა აკრძალა.

სამგზავრო თვითმფრინავების საბარგო ნაწილებში ავია კომპანიებს სპეციალური ადგილები აქვთ გამოყოფილი, რომლებშიც კომერციულ ტვირთსაც ათავსებენ. აკრძალვა სწორედ ასეთ ტვირთებს ეხება და არა მგაზვრების პირად საკუთრებაში არსებულ ნივთებს.

აკრძალვა პილოტებისა და თვითმფრინავების მწარმოებელთა მოთხოვნას მოჰყვა, რადგან ლითიუმ-იონის ბატარეები ცეცხლსაშიშია და ვიდრე ტვირთის ახალი ცეცხლგამძლე შეფუთვის სტანდარტები არ შევა ძალაში, მათი სამგზავრო თვითმფრინავით გადატანა სახიფათოა.

ICAO-ს ოფიციალური განცხადებით აკრალვა ძალაში პირველი აპრილიდან შევა და ორგანიზაციის წევრი ყველა ქვეყანა ვალდებულია რეგულაციას დაემორჩილოს.

ICAO-ს საბჭოს პრეზიდენტის ოლუმუივა ბერნარდ ალიუს განცხადებით, შეფუთვის ახალი სტანდარტები 2018 წლიდან ამოქმედდება. მანამდე ლითიუმ-იონის ბატარეების გადატანა მხოლოდ სატვირთო თვითმფრინავებით იქნება შესაძლებელი.